प्रहरी र युवतीको शव होटलमा

शवसँगै भेटिएको 'सुसाइड नोट'मा मृतकद्वयले आफूहरु श्रीमान्-श्रीमती भएको आसय व्यक्त गरेका छन्, तर उनीहरु प्रेमी-प्रेमिका भएको प्रहरीको दाबी छ 　

बुटवल, ६ भदौ : बुटवलको नेपालगन्ज रोडस्थित सिन्दूर होटलमा प्रहरी जवान र उनकी प्रेमिका मृत अवस्थामा भेटिएका छन्　। शनिबार मध्याह्न साढे १२ बजे होटल आई बसेका उनीहरू आइतबार मध्याह्न १२ बजेतिर मृत अवस्थामा फेलापरेका हुन्　।

होटलको कोठा नम्बर २०१ मा तनहँु घर भई वडा प्रहरी कार्यालय गगनगौँडा कास्कीमा कार्यरत प्रहरी जवान काशीनाथ पण्डित र तनहुँ मनपाङ-५ जन्मस्थल भई ढोरफेदी बस्ने ३० वषर्ीया सीता रानाको शव फेलापरेको हो　।

शवसँगै भेटिएको 'सुसाइड नोट'मा मृतकद्वयले आफूहरूलाई श्रीमान्-श्रीमती भएको आशय व्यक्त गरेका छन्　। तर, उनीहरू दम्पती नभई पे्रमी-प्रेमिका रहेको प्रारम्भिक अनुसन्धानमा खुलेको प्रहरीको दाबी छ　। मृतक पण्डितको घरमा श्रीमती भएको र रानाको श्रीमान् विदेशमा रहेको पाइएको प्रहरी स्रोतले बतायो　। प्रहरी स्रोतका अनुसार जवान पण्डितले श्रीमतीलाई औषधि गराउनु छ भनेर बिदा लिएका थिए　।

उनीहरूले कोठामा लेखेर छाडेको पत्रको अन्तिममा 'हजुरहरूको छोरा-बुहारी' भन्ने उल्लेख छ　। आफूहरूले धेरै दुःख दिएको भन्दै मृत्युपछिका इच्छासमेत　व्यक्त गरिएको छ　। बाबुआमालाई सम्बोधन गरी लेखिएको पत्रमा भनिएको छ, 'हामीले धेरै दुःख दियौँ, हामी दुवै यो संसार छाडेर जाँदै छौँ　।　मेरो अन्तिम इच्छा पूरा गरिदिनुहुन्छ भने कालो बोका ढोरबाराही मन्दिरमा चढाइदिनू　। मेरो भाकल छ　। साथै, दमौलीको बेनीमा मलाई दाहिने र मेरो हितैषीलाई बायाँ राखेर जलाइदिनू या बगाइदिनू　।'

त्यस्तै, अर्को पत्रमा लेखिएको छ, 'सिन्दूर होटलमा खाएको चार हजार रुपैयाँ यहीँ छाडेको छु, त्यो लिनुहोला　। होटल साहुलाई दोष नदिनू　।' आत्महत्या गर्नुअघि होटेलमा बसेको कोठाको ओछ्यानमा दुवैको पूर्णकदको तस्बिर सजाइएको थियो　। घटनाको प्रकृति हेर्दा उनीहरूले आत्महत्या गरेको देखिने प्रहरीको भनाइ छ　।　　

आइतबार बिहान अबेरसम्म कोठाको ढोका नखोलेपछि होटल सञ्चालकले सुरुमा फोन गरेको र फोन नउठेपछि प्रहरीलाई खबर गरेका थिए　। प्रहरी आई ढोका फोडेर हेर्दा पण्डित झुन्डिएको अवस्थामा र राना शौचालयमा मृत अवस्थामा पल्टिएको

फेलापरेका थिए　। घटनास्थल पुगेका इलाका प्रहरी कार्यालय बुटवलका प्रहरी नायव उपरीक्षक दानबहादुर कार्कीले प्रारम्भिक अनुसन्धानमा आत्महत्या देखिए पनि यसको कारणबारे भने थप अनुसन्धानपछि मात्रै थाहा हुने बताए　। उनीहरूले प्रयोग गरेको कोठामा "समाधान प्लस" नामक तीन विषादीका बट्टासमेत भेटिएको प्रहरीले जनाएको छ　।

होटलका सञ्चालक ध्रुव तुलाचनले बिहान कोठा जाँच गर्ने समयको फलो गर्दै फोन तथा ढोका ढकढक्याउनेसम्मका कार्य गर्दासमेत कुनै प्रतिक्रिया नआएपछि प्रहरीलाई खबर गरेको बताए　।

naya patrika............